تفاصيل جديدة كشفتها التحقيقات حول قضية مقتل عروس المحلة على يد زوجها، حيث اعترف الزوج القاتل أن زوجته كانت تتعدى عليه بالسب هو ووالدته وشقيقاته، وأنه سبق أن طلقها ولكن والدها ردها إليه، لتتجدد الخلافات مرة أخرى بينهما، وتصل إلى القتل.
اعترافات قاتل عروس المحلة
جاء في اعترافات قاتل زوجته عروس المحلة: بعد أول مشكلة بأسبوع مراتي سافرت مع والدتي وأخواتي وست جارتنا لشقة الإسكندرية، وكان المفروض يقعدوا يومين وأنا هجيلهم اليوم الثالث، واليوم الثالث الصبح حوال الساعة 10:30 الصبح لقيتها بتكلمني وبتقولي الحقني أهلك اتكاتروا عليا وضربوني فلبست واتحركت، وأنا رايحلها عديت على أختى الكبيرة لإنها مكنتش راحت معاهم، وحكيتلها على اللي حصل، ووأنا رايح فى الطريق لقيت أختي الكبيرة بتكلمني وبتقولى أنا كلمت أخواتك وأمك، وحكولي على اللي حصل، وهما مضربوهاش، إنت لما كنت بتتكلم مع روان (الزوجة المقتولة)، والواد ابن أختي كان واقف جنبها وقال أحمد (قاتل زوجته) عبيط أحمد العبيط، فقامت روان قالتله إنت عيل قليل الأدب متربتش، فقامت أختي قالت لروان هو ميقصدش هو مأخدّهم عليه، فقامت روان ردت وقالت هو أنتم مبتغلطهوش؟! ومن هنا حصل مشادات كلامية بينهم.
تفاصيل واقعة مقتل عروس المحلة
وأضاف قاتل زوجته عروس المحلة في التحقيقات: بعدها جارتنا اللي كانت معاهم في الشقة أخدت روان وقعدوا في أوضة لوحدهم، وأنا في الطريق لقيت أبو روان بيكلمني وبيقولي ينفع اللى أهلك عملوه، فقلتله أنا جاي في الطريق يا عمي وهشوف اللي حصل، وطلبت منه يكلمها ويهديها ولما أوصلها تنزل معايا على طول، ولما وصلت لقيتها قاعدة في الأوضة فدخلتلها فقامت قايلالي أنا ممكن أقوم دلوقتي وأضربهملك (أهل العريس)، فقمت واخدها ونازل وإحنا راكبين في الطريق فكانت بتكلم والدتها وبتحكيلها إللى حصل، وقاعدة تقول أمك دي أنا هضربهالك، وأنا فضلت ساكت ومردتش عليها لحد ما وصلنا البيت وبعدها بيوم والدتها جات فأنا أخدتهم ونزلنا لأختي الكبيرة، فروان حاولت توقع بين أختي الكبيرة وأختي الثانية، فقامت أختي الكبيرة قالتلها متدخليش بين الاخوات، فقامت روان رایحه ناحية الباب وفتحته وقالت بصوت عالي صحیح نسوان المحلة قادرة وغلطت فيهم، وبعدها بفترة والد روان جه واتكلم مع روان وسمع منها اللي حصل وطلب إن هو ينزل يسمع اللي حصل من والدتي وأخواتي، فوالدتي وأخواتي قعدوا معاه ولسه هيبدأوا ويقولوا ايه الى حصل فقامت روان شتمت والدتي وحصل مشادة بین روان ووالدتي وأخواتي، ووالدي زعق مع حمايا، فأنا صعب عليا شتيمة أمي فقولت لروان إنتي طالق، بعدين أبوها ردهالي.
وكانت التحريات أوضحت أن مشادة كلامية نشبت بين المتهم وزوجته، تطورت إلى شجار. وحصلت المجني عليها على سكين مائدة وهددت المتهم به، فقام المتهم بعقر أصابع يدها وانتزاع السكين منها وطعنها في منطقة البطن.
وبعد التأكد من وفاة زوجته، اتصل المتهم بصديقه “محمد ا ع” لطلب المساعدة. وعندما علم المتهم بأن صديقه أبلغ الشرطة، فر هاربًا حتى تم ضبطه بمحيط مسكنه.
