في إطار حملة “السكوت مش علامة الرضا” التي أطلقتها مبادرة “صوت لدعم حقوق المرأة”، في ضوء حملة الـ 16 يومًا لمناهضة العنف ضد المرأة، والتي تهدف لتسليط الضوء على قضية العنف المنزلي والإقتصادي، نقوم باستعراض شهادات خاصة لـ “صوت” موثقة عن العبء الاقتصادي التي تعاني منه المرأة المعيلة.
وتجدر الإشارة إلى أنه تم الحصول على موافقات من قبل أصحاب تلك الشهادات لنشرها.
شهادات خاصة لـ”صوت” عن العبء الاقتصادي التي تعاني منه المرأة المعيلة
شهادة 1: حيث تروي ( أ.ف ): “أنا قضيت فترة كبيرة في شغلي أحاول أثبت إني متأثرتش بالجواز ولما خلفت قعدت أحاول أثبت إني مختلفتش برضو بعد الخلفة وده زود عليا أعباء كثيرة جداً وخلاني بشتغل شغل مضاعف لمجرد إني بثبت لمديري إني قادرة أشتغل في ظل إني أم ومعيلة وكل ده أثر عليا كعبء اقتصادي في ظل مفيش أجور كافية والأوضاع الاقتصادية سيئة جدًا والمعيشة غليت”.
وأكملت حديثها: “وعشان أقدر أكون بأمان بستخدم وسائل مواصلات أكثر كلفة وده بيزيد عليا المصاريف، وممهما ارتفع مرتبي برضو مش كافي لأنه المعيشة بتزيد أكثر وأكثر”.
شهادة 2: تقول (ر.ن): “أنا ست منفصلة وأعول طفلين (بنت 6 ابتدائي ، ولد 1 ابتدائي ) فالمرحلتين صعبين ومحتاجين مني أخصص وقت لهم والوقت ده مينفعش مع مواعيد الشغل لأنه أغلبه بيكون الصبح وهم بيخلصوا مدرستهم وبيرجعوا البيت وأنا لسه بالشغل ولما برجع بيكونوا ناموا أو نص يومهم ضاع ويادوب أعمل الأكل ياكلوا ويحلوا الواجبات فمفيش وقت للمذاكرة والقعدة معاهم غير الويك اند وده بيعتمد على البيت لو مش محتاج تنظيف وشغل فيه.
وتابعت، قائلة: “أنا لازم أشتغل لأني تقريبًا أنا المتكفلة بمصاريفهم كلها. وده كله بيشكل عبء اقتصادي كبير عليا في ظل الأسعار زادت والأجور متغيرتش فمرتبي مش بيكفي لآخر الشهر وده بيخليني أضطر أشوف شغل فريلانسر أو حاجة أقدر أعملها في نص الأسبوع عشان أزيد مرتبي ولو شوية والوضع عليا كست منفصلة ومعيلة صعب جدًا جدًا”.
