تفاصيل واقعة تعرض فتاة للتحرش بـ”ميكروباص”

تعرضت فتاة للتحرش والاعتداء اللفظي، خلال استقلالها “ميكروباص”، وذلك رغم جلوسها جانب السائق وحدها لتحمي نفسها من التعرض لمواقف بشعة، إلا أنها لم تسلم من الاعتداء من قبل رجلين بنفس السيارة، حسبما ادعت عبر صفحتها الشخصية على فيسبوك.

تفاصيل تعرض فتاة للتحرش بـ”ميكروباص”

وكتبت الشابة حسناء أشرف: “أنا مبركبش مواصلات عامة طول حياتي بسبب فوبيا من التعرض للتحرش من رجالة بلدنا ومرتبي كله ضايع على أوبر فقط.. النهاردة الدنيا مكانتش زحمة أوي في قولت فيها إيه لما أركب مواصلات”.

وأضافت حسناء: “كالعادة طلع قرار خاطئ تمامًا، قاعدة في الكرسيين اللي جنب السواق حاطة السماعات، كل شوية أحس بإيد بتتحط على الكرسي بتاعي من ورا ولازقة في ضهري، بصيت لقيته راجل كبير قولتله ممكن بس إيدك بعد إذنك يا حج، بصلي باستغراب ومتحركش، فقدمت أنا بنفسي قدام، كل شوية إيده بتتحرك مرة تانية إما تشد شعري أو تعمل حاجة غريبة أنا مش قادرة أحددها”.

وتابعت حسناء: “لفيت قولتله بعد إذنك بس يا حج إيديك من على الكرسي، قالي إيه هو أنا لمستك إنتي فاكراني بعاكسك يعني.. قولتله أنا مقولتش إن حضرتك بتعاكسني ممكن بس إيدك من على الكرسي.. راح ماسك الكرسي بايديه الاتنين وقعد يخبط فيه وقالي لا مش هسيبه هو إنتي فاكراني قدك وهعاكسك قولتله هو إنت بتعمل إيه شيل إيدك من عالكرسي.. ماليش دعوة قدي ولا لا أنا بقولك الكرسي بتاعي”.

واستكملت حسناء: “لقيت ولد جنبه بيقولي إنتي بتتكلمي كدا ليه ده راجل قد أبوكي.. قولتله خليك ف حالك لو سمحت أنا مغلطتش فيه.. لقيت البطل اللي في الفيديو اللي تقريبا مستحملش يشوف واحدة، راجل كبير ضايقها فبترد عليه وبدأ يقولي إنتي بتتكلمي كدا ليه يا بنت الـ يا …. وسيل من الشتايم الزبالة اللي من كتر ذهولي وخضتي منها فضلت ساكتة شوية ومجاش في بالي غير إني اطلع الموبايل أصوره”.

واختتمت حسناء: “طب أنا دلوقتي مركبتش مواصلات من سنين ولما قررت أجرب حظي يحصل كدا.. هل ده معناه إني هفضل طول عمري مش عارفة أحوش جنيه بسبب فلوسي اللي ضايعة على أوبر وديدي؟ هل كل مرة هحاول إني أوفر فيها هتعرض لمواقف كل ذنبي فيها إني دافعت عن حقي؟”.